ВЕДЕКИНД БИЛ ЗАБРАНУВАН И ЦЕНЗУРИРАН

Новата седма претстава на „Интимен театар“ чија премиера е закажана на 28 декември (понеделник) и на 30 декември (среда) е правена по пиесата на Франк Ведекинд, „Будење на пролетта“ и по документарни материјали, поточно лични раскази собрани од самата екипа.

Франк Ведекинд (1864-1918) е германски писател кој пишувал во времето кога Фројд ја пласира својата теорија за сексуалноста, во почетокот на 20 век.

Почнал како новинар и актер, пишувајќи песни и пантомими. Неговата прва драма „Будење на пролетта“ е всушност и негово најпопуларно дело. Голем дел од неговата продукција ја чинат драми во кои главно место зазема светот на нагоните и страстите. Често се повикува и на малограѓанскиот морал и општествени конвенции кои ја опишуваат детално човековата исконска страст и љубов.

„Будење на пролетта“ предизвикала многу бурни реакции во тоа време. Ова дело ја критикува сексуално угнетувачката култура на 19 век и дава дава жива драматизација на еротските фантазии. Со оглед на контроверзните теми (пубертет, сексуалнос, силување, злоупотреба на деца, хомосексуалност, самоубиство, абортус), претставата често била забранета или цензурирана.

За прв пат е изведена на англиски јазик во 1917 година во Њујорк, пред одбрана публика. Ведекинд има големо значење за развојот на експресионизмот во германската драматургија, а извршил големо влијание на многу писатели во средна Европа.

РЕЖИСЕРКАТА РИСТЕВСКА ЌЕ ГЛУМИ ВО НОВАТА ПРЕТСТАВА

Најголемо изненадување во новата претстава „Будење на пролетта“, која се подготвува во „Интимен театар“ е режисерката Софија Ристевска која за првпат ќе се проба и како актерка. Покрај, неа во новата претстава, играат и актерот Здравко Стојмиров и Стефанија Милевска, позната пејачка, танчерка и актерка.

Режисерката на „Будење на пролетта“ вели дека отсекогаш сакала да се стави во кожата на актерите.

- Ова е прв пат да глумам во моја претстава. Се решив на овој чекор за да ја запознаам уште подобро професијата на моите глумци, за да можам во иднина уште поумешно и поиновативно да работам со нив - вели Ристевска.

Режисерката Софија Ристевска ќе глуми 

Таа дипломирала театарска режија во Софија, Бугарија и досега има режирано над триесет претстави во најразлични театри во државата, во Србија и Бугарија. Нејзиниот „Интимен театар“ постои веќе пет години и во овој независен културен простор, таа се обидува да креира театарски свет заснован врз документарни материјали, најчесто создавани од учесниците во проектот.

Актерот Здравко Стојмиров, дипломирал актерска игра во Благоевград, Бугарија и досега учествувал во речиси сите продукции на „Интимен Театар. Работи и во „Битолски“ и „Прилепски театар“, како и во многу проекти на „Мал Драмски театар“ од Битола. Неговиот актерски израз е многу специфичен и се карактеризира со големи трансформации,  изразени преку лабораторната работа со телото и гласот.

Актерскиот израз на Здравко Стојмиров е многу специфичен

Стефанија Милевска е млада пејачка, танчерка и актерка, којашто завршила џез пеење во Софија, Бугарија. Нејзините вокални и физички способности, даваат големо богатство и надоградување на нејзиното актерско присуство на сцената. Стефанија беше дел од претставата „Со љубовта шегување нема“, на „Интимен театар“, а ова е нејзина втора соработка со нашата театарска куќа. Овој месец, Стефанија го промовираше и својот прв музички албум „Ретро – Перспектива“ и имаше настапи во живо во речиси сите поголеми градови во државата. „Будење на пролетта“ е работена по текстови од Франк Ведекинд и документарни материјали. Режијата е на Софија Ристевска, драматург е Билјана Крајчевска, а кореографијата е на Кире Миладиноски.

Стефанија Милевска е млада пејачка, танчерка и актерка

ВО ИНТИМЕН ТЕАТАР СЕ БУДИ НОВА ПРЕТСТАВА

Интимен театар наскоро ќе ја изненади својата верна публика со нова премиера, која овојпат е целосно посветена на жената. Најновиот проект „Будење на пролетта“, ги разгледува проблемите на женската популација во нашето општество, како сегрегацијата и етикетирањето на секојдневно ниво, врз различни основи. Во ова време на суров неолиберализам, кога жената има професија и кариера, а плус мора да е добра мајка, домаќинка, сопруга и љубовница, таа се соочува со константната нетрпеливост и нетолерантност од страна на општеството, што не е едуцирано и истренирано, за да го толерира моделот на ЖЕНА – ЛИДЕР.

- Нашата претстава со голема доза на хумор и самокритика, ги разгледува проблемите на жените што се борат активно за своите позиции и не потпаѓаат под ничие влијание. Ги разгледуваме нивните проблеми со тежината и нивното активно посетување на часовите по аеробик. Ги разгледуваме и ситуациите со шефовите мажи во фирмите, што редовно им предизвикуваат непријатни ситуации. Ги анализираме и желбите за екстремни спортови, што создаваат високо ниво на андреналин, како заштитен механизам против светот што не опкружува и на крајот зборуваме за свадбите и за сите подготовки окулу нив. Со огромна доза на хумор анализираме со колку многу предизвици се соочува жената и колку многу очекувања се вперени во неа. А за да биде иронијата поголема, дури и кога е најзаслужна, таа тешко го добива своето признание -вели режисерката на претставата Софија Ристевска.

Режисерката Софија Ристевска

Фотографија од претставата „Будење на пролетта“

Новата претстава е работена по текстови од Франк Ведекинд и документарни материјали. Режијата е на Софија Ристевска, драматург е Билјана Крајчевска, а кореографијата е на Кире Миладиноски.

 

ЗБОР-ДВА ЗА АКТЕРСКАТА ЕКИПА

Тројца актери ги толкуваат улогите во нашата претстава „Со љубовта шегување нема“ – Здравко Стојмиров, Катерина Аневска и Стефанија Милевска. Режисер на новото дело на „Интимен театар“ е Софија Ристевска. Користиме текстови од францускиот писател Алфред де Мисе и документарни материјали. Премиерата е на 27 декември (сабота) во 20 часот. Закажавме изведби и на 28 и 29 декември во истиот термин. Во меѓувреме запознајте се со тројцата актери од „Со љубовта шегување нема“.

Здравко Стојмиров – Наградуван глумец во потпетици

Здравко Стојмиров толкува женски лик во „Со љубовта шегување нема“. Ја разработуваме идејата дека полот добиен со раѓањето не го определува нашиот вистински пол. Секој има право да ја донесе таа одлука за себе, а користиме и приказни за припадници на ЛГБТИ заедницата. Здравко играше и во првата продукција на „Интимен театар“ откако влеговме во нашиот простор на улица Стив Наумов број 35, претставата „Трансферату“. Има дипломирано на универзитетот „Неофит Рилски“ во Бугарија. Играше во „Дневникот на лудиот“ во режија на Роберт Симоновски, а за изведбата доби прва награда на фестивалот „Фиат“ во Подгорица. Забележливи се и неговите улоги во „Црвено“, „Мажот е маж“ и „За домот се работи“ на режисерот Мартин Кочовски. Со Софија Ристевска има соработувано и на „Приказна за зоолошката“ и „Домот на Бернарда Алба“.

Катерина Аневска – На независна сцена и во национален театар

Катерина (десно на фотографијата доле) има дипломирано на Факултетот за драмски уметности во Скопје. Со нашата режисерка Софија Ристевска веќе работеше на „Љубовницата“ и „Љубовта е демоде“. Најголемиот број од нејзините премиери се на сцената на битолскиот театар. Глуми во актуелната претстава „За домот се работи“ на Мартин Кочовски. Има соработувано со словенечкиот режисер Диего де Бреа, а значаен дел од нејзината професионална биографија се: „Каренина Made in Macedonia“, „Травничка хроника“, „Обична приказна“ итн.

Стефанија Милевска – Поп и џез пејачка во актерска кожа  

Стефанија (лево на фотографијата) има дипломирано на катедрата за поп и џез пеење на Новиот бугарски универзитет во Софија. Беше дел од бендот „Блусис“ и кореограф на мјузикл и фестивали. Долг период работи и во модното студио „Анастасија“. Заклучокот е дека манекенството и модерниот балет заземаат голем дел од нејзината биографија. Стефанија заедно со Кире Миладиновски работеше и на кореографијата на нашата претстава „Со љубовта шегување нема“.

КОГА ВЕЛАМ „ИНТИМЕН ТЕАТАР“, МИСЛАМ СОФИЈА РИСТЕВСКА

Главна моторна сила на „Интимен театар“ е Софија Ристевска која е режисерка и на нашето дело во најава - претставата „Со љубовта шегување нема“. Има работено во повеќе национални куќи, но во октомври 2013 години одлучи во Битола дa го отвори првиот независен, приватен театар основан без надворешни инвестиции. Оттогаш просторот на улица Стив Наумов број 35 стана креативно сврталиште за многу уметници. Се организираше летен фестивал на танц и современ театар и се одиграа голем број на професионални претстави меѓу кои и контроверзната „Трансферату“. Софи сега најавува ново дело – „Со љубовта шегување нема“ во која главните улоги ги толкуваат Здравко Стојмиров, Катерина Аневска и Стефанија Милевска. Премиерата е закажана за 27 декември (сабота) во 20 часот, а ќе има и изведби на 28 и 29 декември во истиот термин. Секако локацијата е „Интимен театар“. 

Софија Ристевска има дипломирано на отсекот по режија на Националната академија за театар и филм „Крсто Сарафов” во Софија, Бугарија. Стои зад повеќе претстави во националните театри и е активен дел од македонската независна сцена. Во велешкиот Народен театар ја има поставено познатата „Жени“, а во Малиот драмски театар во Битола ја работеше „Жени без маж и ништо повеќе“ за која ја освои првата награда на фестивалот „Експонто“ во Словенија. Но ќе се задржиме на независните проекти. Ја режираше контраверзната „Лили“ која се играше во клубот „Џубокс“ во Скопје. Потоа дојде и кабаре-претставата „Љубовницата“, па „Љубовта е демоде“, монодрамата „Лола“ ... Секогаш одбира актуелни и скокотливи приказни кои покренуваат социјални прашања. Нејзиниот театар има женски глас и воедно  е гласен и бунтовен. 

РОМАНТИЧАР ОД НЕКОЕ ДРУГО ВРЕМЕ

Си живеел само ако си сакал, вели францускиот писател Алфред де Мисе. Во претставата „Со љубовта шегување нема“ користиме текстови од овој автор кој е еден од првите во правецот, романтизам. Сепак нашиот проект го надополнуваме и со документарни материјали. Премиерата на „Со љубовта шегување нема“ ја закажавме за 27 декември (сабота) во 20 часот, а ќе има изведби и на 28 и 29 декември во истиот термин. Ве очекуваме во „Интимен театар“ во Битола, а во меѓувреме запознајте се со Алфред де Мисе.

Фотографија од претставата „Со љубовта шегување нема“ во која користиме текстови од Алфред де Мисе

Делата на Алфред де Мисе биле инспирација за голем број на уметници меѓу кои и за композиторот Жорж Бизе. Во исто време како Оноре де Балзак го добива орденот Легија на честа, а потоа станува дел од Француската академија на науките и уметностите. Сепак кога се говори за овој писател, најчесто првата асоцијација е неговата љубовна афера со писателката Жорж Санд. Траела две години, а потоа Алфред де Мисе ја напишал автобиографската новела „Исповед на детето на векот“ по која во 2012 година е снимен филм со Шарлот Гензбург и Пит Доерти го главните улоги. Се верува дека е автор и на лезбејска еротска новела која исто така е моделирана според Жорж Санд.

Инспирирал многу уметници, а позната е и неговата бурна врска со писателката Жорж Санд

Повелете неколку цитати од Алфред де Мисе:

* Колку е величествено, а во исто време и болно, да бидеш исклучок

* Големите уметници немаат земја

* Човекот е ученик, а болката е неговиот учител 

БОКС-МЕЧ ПОМЕЃУ ЉУБОВТА И ПАРИТЕ. КОЈ Е ПОСИЛЕН?

Претставата „Со љубовта шегување нема“ во режија на Софија Ристевска ги спротивставува љубовта и капиталот. Ги става во боксерска арена и ги анализира резултатите од тој крвав меч. Главните улоги ги толкуваат: Здравко Стојмиров, Катерина Аневска и Стефанија Милевска. Најновата премиера на нашиот независен „Интимен театар“ е закажана за крајот на декември. Претставата е работена според текстови на еден од првите автори во правецот романтизам, Французинот Алфред де Мисе и документарни материјали. 

Денешниот свет е конструиран според правилата на капиталот. Човекот пред себе нема многу алтернативи освен да се потчини и да се постави во функција на парите. Според тоа можеме да заклучиме дека СО КАПИТАЛОТ ШЕГУВАЊЕ НЕМА или како што вели германскиот драматург и писател Рене Полеш, ЉУБОВТА Е ПОСТУДЕНА ОД КАПИТАЛОТ. Токму за тоа говори нашата претстава. Најприфатлива особина на човекот станува неговата потрошувачка и финансиска моќ. Љубовта оди во втор план затоа што не се вклопува со капиталистичко-политичките односи кои во моментов владеат со светот. Таа некогаш била основна движечка сила, а сега константно е поставувана на испит и масовно е манипулирана.

Нашиот актер Здравко Стојмиров толкува женска улога затоа што ја разработуваме и идејата дека полот добиен со раѓање не го определува нашиот вистински пол. Секој има право да ја донесе таа одлука за себе. Во претставата има и приказни за припадници на ЛГБТИ заедницата.

„Со љубовта шегување нема“ е повик да создадеме похуман, посолидарен и социјално рамноправен свет. Место каде секој човек ќе има право на слобода и љубов затоа што игнорирањето на овие две категории може многу да нè чини!

Подгответе се да нѝ дојдете на гости во „Интимен театар“ сместен на улица Стив Наумов број 35 во Битола (во близина на месната заедница „Стево Патакот“). Наскоро ќе објавиме информација околу датумот на премиерата, цената на билетите и каде да резервирате место.